www.govarikoch.com
ساتەوەختی تێڕامان
ئارام عەلی عەزیز
ببورە خوێنەری بەڕێز ئەگەر هەڵوەستەیەكم پێكردبیت تاساتەوەختێك لەكاتە بەهادارەكەت بگرم و هەردووكمان پێكەوە تیایدا لەقسەیەكی نەستەق رامێنین، كە پێشتر پەیامبەرێك گوتویەتیی و حەكیمێك جێبەجێی كردوەو ئاقڵێكیش بەناوەڕۆكیدا شۆڕبۆتەوە، ئەویش ئەوەیە: ( خۆت بناسە). دوای ئەم تێڕامانەیش لەو بڕوایەدام لەیەكتر دەبوورین و بەسۆزوهەستێكی ئینسانی برایانە باوەش بەیەكتردا دەكەین و كۆتری ئاشتی بەسەر شانمانەوە لەشەقەی باڵی دەدات و بەئاسمانی پانوبەریندا دەسوڕێتەوە.
خوێنەری بەڕیز، بمكە بەهاورێی مەجلیست و لەگەڵ خۆت دامبنیشێنە لەهەر كوێیەك هەیت، ئینجا تۆ لەناو گوڵ و گوڵستانی رەنگاوڕەنگ و گمەی كۆترو جریوەی پاساری سەر دارەكانی باخی شارەكەتدایت ، یان لەسەر راخەرێكی ژوورە بچوكەكەتدا دانیشتویت و قاقای پێكەنینی مناڵەكەت ئەو ناوەی پڕكردوە لەخۆشی، یان تۆ لەژووری پێشوازیی لەگەڵ میوانەكانتدا باسی دواپرۆژەی سەركەوتوی داهاتوت دەكەیت، تەنانەت ئەگەر تۆ لەنوسینگەی شوێنی كارەكەشتدابیت لەو كۆمپانیایەی، كە كاری تێدا دەكەیت و ساتەوەختی قاوەخواردنەوەیەكت بۆ رەخسا بێت، بمكە بەهاو مەجلیست لەو شوێنەی كە لێیت، ئینجا تۆ هەر كەسێك بیت و لەهەر كوێیەك بیت، تا لەساتەوەختێكی تێڕاماندا زیاتر خۆمان بناسین، دڵنیاشبە كە بیروبۆچوونەكانت ناشێوێنم، بەڵكو كاروبارە ئینسانیەكانمان رێَكدەخەینەوە.
ئەمڕۆ هەموومان بەجەنجاڵێكی درێژخایەنی بیروئایدۆلۆجیادا تێدەپەڕین، كە تیایدا ئاستی شێواندنی پڕەنسیپ و بەهاكان واقعێكی شەبیهی ئەو قۆناغەی هیناوەتەكایەوە، كە تیایدا فریشتەو جن و بەشەر بەگێژاوێكی سەرسوڕمانی گەورەدا تێپەڕین، كە پرسیار بوو لەوەی ئێمە كێین؟ كێ دروستی كردووین؟ نهێنی هەبوون و وجودمان چیە؟ پرسیارگەێك خرپەی دەروون قوڵیكردەوەو لەفەلەكی مێشكدا سوڕایەوە لەنێوان عەقل و دڵ، روح وماددەو تایبەت و گشتیدا، دەروازەی بوارەكانی سلوك و هەڵسوكەوتی كردەوە لەوەی، كە هی تۆیەو لەوەی كە لەسەرتە لەماف و ئەركدا. پرسیارگەلێك بانگهێشتی وەڵامێكی دەكرد، بۆ رێكخستنی پێداویستیەكانی ژیانی رۆژانەمان لەقوت و ئاسایشدا، سەرسوڕمانێك بەرەو ماهیەتی دیانەتە ئاسمانیەكان و بیروباوەڕە تەشریعیەكان و راستڕەوو چەپڕەوو خۆرهەڵاتیی و خۆرئاوایی و كۆمۆنیستیی و سەرمایەداریی و داپۆشكاریی سەردەمی عەولەمەمان دەبات.
لەسەردەمی ئەمڕۆماندا یاساكانی كیمیا، فیزیا، ئەتۆم، ئەلكترۆنیات و ماتماتیك، تادەگاتە یاساكانی گەردوونناسی و پراكتیكەكانی دەزانرێن و ئاشكران، بەڵام دیسان هەر هەمویان ، بەبێ گەوهەری یاسای فكروئایدۆلۆجیا ناتوانن ئاسوودەیی و بەختەوەری خواستراومان پێببەخشن. دەگەڕێینەوەو دەڵێین، قۆناغێكی سەرسوڕمانی گەورە، كە پێشتر فریشتەو جن و بەشەر پێیدا تێپەڕین، وەڵامی ئەلكەون لەشێوەی خەلقی ئادەم لەگڵ و باڵابوون پێدانی لاهوتی رەهادا هاتەوەو بەرەوڕووی پرسیارگەلێك بوەوەو دیالۆگێكی هێنایەكایەوە و واقیعەكەیش كتابێكی لێكەوتەوە، كە مقەوماتی بنیاتنانی شارستانیەتێكی ئینسانی لەخۆگرت، دوای ئەوەی لەو واقیعەیەدا مەرج و پێداویستیەكانیی بنیتنانی ئەو شارستانیەتەی لەروی فكرو هێزو ئیمكانیاتدا بەدەستهێنا، كە شورەی سنوورەكانی ئەو شارستانیەتە ئینسانیە لەناوەڕاستی خۆرهەڵاتدا، لەباكورەوە سەرچاوەكانی دیجلەو فوراتە و لەباشوریشەوە تاڤگەكانی سەرچاوەی نیلە، ئەیكوناتەكانیشی كێوی سیناو چیای زەیتون و مەككەی پیرۆزە، دابەزینەكەی جیزەو بەرزبوونەوەكەیشی چیای سنجارە لەكوردستاندا. حەزرەتی موسا خودا رەوانەی كردو پاككردنەوەی یەكەمی لەنێوان كێوی سیناو سەرچاوەكانی نیل پێسپارد، حەزرەتی عیسا نێوان قودس و كوردستانی پاككردەوەو حەواریەكان و شوێنكەوتوانیشی هەموو ئەوروپایان تاسنوورە ئاویەكەی لەكوفروئیلحاد پاككردەوە، هاوەڵانی حەزرەتی محەممەدیش لەخۆرهەڵاتەوە تا چین و لەخۆرئاوایشەوە تا باكوری ئەفریقیا تەواویانكرد.
دواتر تەوژمە پێچەوانەییەكان دەستی پێكرد، كە لێرەدا ناچینە ناو وردەكاریەكانیان و تەنها مانشێتە گشتیەكانیان دادەنێین: كەنیسەی یەهودی لەناوبردرا، كەنیسەی مەسیحیەت لە پانتاییەكی جوگرافی بچوكدا گەمارۆدراو، بیروبڕوایان گۆڕدراو پێچەوانەكرایەوە. بەڵام ئەمڕۆ ئەو تەوژمە پێچەوانەییانە كە لەژێر ناوو دروشم و ئەدرێسی جیاجیا دەستیپێكردبوو، وا لەخۆرهەڵاتی ناوەڕاستدا تێكدەشكێنرێن و مرۆڤایەتی تیایدا سەردەمێكی نوێ دەستپێدەكات. ئەمە چیڕۆكی ئیمان و بڕوا بوو كە بۆم گێڕایتەوە خوێنەری بەڕێز، ئایا دوژمنە راستەقینەكەمانت ناسیی؟ ئیتر بەخوات دەسپێرم و خوداحافیز.
Sunday, February 14, 2021
 Print